🌼 جَـرِيـدَة دَالِـيـدَا 🌼
نَـصـنَعُ طِـفْــلًا لـلـغَــد
جَـرِيـدَة الـطِّـفـلِ الأوُلـىٰ
🌼 DALIDA MAGAZINE 🌼
رَئِيسُ التَّحرِير
حـســــام الـــديـــن طـلـعــت
………………………………
” فرفورة “
بقلم الشاعر الرائد: خالد فضل
………………………………
أنا فرفورة شطورة
أنا رايحة لسنة أولى
وبدعى ربنا وأقوله
اكون دكتورة مشهورة
ومامتى بحبها خالص
وبابا بحبو .. عسولة
وبودى أخويا .. قلبى يا ناس
بحبو أوى .. كدة وخلاص
بحب حضانتي وكتابي
وكراستي وألواني
وفصلي ف الدور التاني
بحب زمايلي ف الدكة
وبمشي معاهم السِكة
نغنى أغاني مطيورة
بألحانها الصغيورة
وطيري معانا
طيري كمان
وطيري ل فوق يا عصفورة
نبص نشوف شجر مكشوف
نموت م الخوف
ونجري نستخبى بعيد
وشابكين الإيدين بالإيد
ونهمس يا امه جاي عفريت
ومطرة ترخ فوق روسنا
وندعي يارب تاني تزيد
يقرب بيتنا أعمل باي
وتوتة زميلتي تعمل باي
وصلت البيت .. وصلت إزاي
وبوسة بإيد صغنتوتة
وأنا فرحانة مبسوطة
أشوف بابا وأشوف بودى
وماما هتحكي حدوتة
وعيني تنام مع الأحلام
وشايفة نفسي كتكوتة
وباكل نص بسكوتة
ولسه بغني أغنية
أنا فرفورة شطورة
أنا رايحة ل سنة أولى
وبدعي ربنا وأقوله
أكون دكتورة مشهورة
……………..
الشاعر: خالد فضل.
إهداء إلى حفيدتي الجميلة الأميرة / فريدة.
مِنَصَّةُ الفَرِيدَةِ 