مطرود من رحمة البشر.. بقلم.. حسام الدين طلعت.

ازيك يا قلبي،
عاملة ايه يا نور عيني
كل لحظة مرت علينا من أول حياتنا لغاية النهاردة كانت لحظات وأوقات مختلفة أغلبها أوقات صعبة، اللحظات والأوقات دي ألمها وحزنها أخدنا منه أنا وانتي كل واحد نصيبه.
في أول حياتنا سوا يا حب عمري، حبيتك وحضنت فرحتي بالحياة وسعادتها جوة عيونك، حبيتك من كل قلبي، ومترددتش لحظة في إرضائك وإني أسعى لامتلاك قلبك وحبك.
حبيت فيكِ قلبك الطاهر المليان ود وإيمان، حبيت روحك وكلامك وابتسامتك، حبيت لمسة من إيديكِ، حسيت إنهم نجاة من ظلام ملا حياتي قبلك.
حبيت كل وقت قضيته معاكي، وحبيت ودبت في حضنك، حبيت وجودي ممزوج بضحكة من شفايفك وابتسامة من عيونك.
حبيت…….. وإني أذوب في تفاصيله، وأذوبه فيا كأننا واحد.
حبيت الحميمية مع قلبك، وعمري ما حبيت ده إلا معاكي يا حب عمري.حبيت تكوني حبيبة وأم، زوجة وصديقة، وبنتي الحبيبة، حبيت تكوني مرسي أرمي فوقها حمولي، وتكوني مينا ترحل منها الأحزان.
حبيتك سفينة تمرق بيا وسط موج عاتي، ولا يهمني شيء، حبيتك نجاة.
انتي مني ومني أنا نبت حبنا في صورة إنسان، أجمل إنسان.
أوقات كتيرة كنت أنظر لقلبك وأقوله إني بحبك وفزت بيك، إن شرياني نبضه جاي منك، أنظر لوجهك المليح حبيبي وأتأمله، وانتي صاحية واللا نايمة أروح لحده وأحفظ ملامحه وأنقشها على روحي، صدقيني يا قلبي حبيتك وكانت أجمل وأسعد وأحلى دقايق عمري جوة حضنك.
أما………… حتة مني ومنك، حب متجسد في أرض حبنا، أجمل وأروع هدية ربنا أعطاها لينا، ربنا يحميها ويسعد أيامنا بوجودها.
بكتبلك يا قلبي بعد غيبة عنكم، بعد ما اتحرمت من جنتي وياكم، بإيدي، بكتبلك عشان أقولك، إني حبيتك وحبيت……….. وإني باتعذب في بعدي عنكم، وكل لحظة مش طايلها في قربكم كرباج على ظهر قلبي.
بكتبلك مش عشان أفكر قلبك باللي مش قادر ينساه بسببي، لكن بكتب لقلبك رسالة حب ول……… عمري وحياتي، بكتبلك وبكتبلها كلمات يمكن تخلد حبي في قلوبكم إذا مجمعتناش الحياة.
بكتبلك عشان أقولك إني اتعلمت أحبك من جديد، وإني تهت في طريق ماتخذتش قلبك فيه دليلي، وإني نادم، وإني عازم أتولد في قلبك حسام جديد، وأكتب حروف عشقك، حروف اسمك في كل جرة قلم، مهما طال الزمن هفضل أقول إن حبك، وألم البعد عنك وعن حتة من تكويني خلى قلبي القاسي يتقطع حتت، على أعتاب جنتك، يصرخ، يقول، الرحمة ياربي، أنا خلاص تبت، واتعلمت، وييجي صوت ضميري يضرب بقوة، يفوقني بميت قلم، انت عاصي، انت منبوذ للأبد، انت مطرود من رحمة البشر، يتولى حسابك رب البشر.